ಮದುವೆಯಾಗುವುದಾಗಿ ಸುಳ್ಳು ಭರವಸೆ ನೀಡಿ ಅತ್ಯಾಚಾರ ಎಸಗಿದ ಆರೋಪ ಹೊತ್ತಿರುವ ಪೊಲೀಸ್ ಅಧಿಕಾರಿಯೊಬ್ಬರು, ಸಂಬಂಧವನ್ನು ಮುಂದುವರಿಸುವ ಮುನ್ನವೇ ಜಾತಕವನ್ನು ಪರಿಶೀಲಿಸಬೇಕಿತ್ತು ಎಂದು ಸುಪ್ರೀಂ ಕೋರ್ಟ್ ಮಂಗಳವಾರ ಗಂಭೀರ ವಿಚಾರಣೆಯ ನಡುವೆ ಲಘು ಧಾಟಿಯಲ್ಲಿ ಅಭಿಪ್ರಾಯಪಟ್ಟಿದೆ. ಪ್ರಕರಣದಲ್ಲಿ ದೂರುದಾರರು ಮತ್ತು ಆರೋಪಿ ಇಬ್ಬರೂ ಹಿರಿಯ ಪೊಲೀಸ್ ಅಧಿಕಾರಿಗಳಾಗಿದ್ದು, ಜಾತಕ ಹೊಂದಿಕೆಯಾಗಲಿಲ್ಲ ಎಂಬ ಕಾರಣಕ್ಕೆ ಮದುವೆಯಿಂದ ಹಿಂದೆ ಸರಿದಿರುವುದನ್ನು ನ್ಯಾಯಾಲಯ ಪ್ರಸ್ತಾಪಿಸಿತು.
ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಜೆ.ಬಿ. ಪರ್ದಿವಾಲಾ ಮತ್ತು ಕೆ.ವಿ. ವಿಶ್ವನಾಥನ್ ಅವರಿದ್ದ ಪೀಠ, ಪಾಟ್ನಾ ಹೈಕೋರ್ಟ್ 2024ರಲ್ಲಿ ರದ್ದುಪಡಿಸಿದ್ದ ಪ್ರಕರಣವನ್ನು ಪ್ರಶ್ನಿಸಿ ಸಂತ್ರಸ್ತೆ ಸಲ್ಲಿಸಿದ್ದ ಅರ್ಜಿಯನ್ನು ಆಲಿಸಿತು.
ವಿಚಾರಣೆ ವೇಳೆ, ಎಫ್‌ಐಆರ್‌ಗೆ ಆಧಾರವೇನು ಎಂದು ಪೀಠ ಪ್ರಶ್ನಿಸಿದಾಗ, ಆರೋಪಿಯು ಮದುವೆಯಾಗುವುದಾಗಿ ನಂಬಿಸಿ ಲೈಂಗಿಕ ಸಂಬಂಧ ಬೆಳೆಸಿದ್ದಾಗಿ ದೂರುದಾರರ ಪರ ವಕೀಲರು ತಿಳಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಪರ್ದಿವಾಲಾ, "ಅವರ ಭರವಸೆಯ ಆಧಾರದ ಮೇಲೆ ನೀವು ಸಂಬಂಧವನ್ನು ಮುಂದುವರಿಸಿದಿರಾ? ಇದೇ ನಿಮ್ಮ ವಾದವೇ?" ಎಂದು ಖಚಿತಪಡಿಸಿಕೊಂಡರು. ನಂತರ, ಆರೋಪಿ ಮದುವೆಯಿಂದ ಏಕೆ ಹಿಂದೆ ಸರಿದರು ಎಂದು ಪೀಠ ಕೇಳಿದಾಗ, ವಕೀಲರು "ಜಾತಕಗಳು ಹೊಂದಿಕೆಯಾಗದ ಕಾರಣ" ಎಂದು ಉತ್ತರಿಸಿದರು.
ಇದಕ್ಕೆ ನಯವಾಗಿ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಪರ್ದಿವಾಲಾ, "ಸಂಬಂಧದಲ್ಲಿ ಜ್ಯೋತಿಷ್ಯವನ್ನು ತಡವಾಗಿ ಪರಿಗಣಿಸಿದಂತಿದೆ. ನಕ್ಷತ್ರಗಳು ಹೊಂದಿಕೆಯಾಗದಿದ್ದರೆ ಉತ್ತಮ ವೈವಾಹಿಕ ಜೀವನವನ್ನು ಹೇಗೆ ನಡೆಸುತ್ತೀರಿ? ಸಂಬಂಧಕ್ಕೆ ಕಾಲಿಡುವ ಮುನ್ನವೇ ನೀವು ಜಾತಕಗಳನ್ನು ಹೊಂದಾಣಿಕೆ ಮಾಡಬೇಕಿತ್ತು. ಮದುವೆಯ ಸಮಯದಲ್ಲಿ ಮಾತ್ರ ನೀವು ಜ್ಯೋತಿಷಿಯನ್ನು ಸಂಪರ್ಕಿಸಿದ್ದೀರಿ," ಎಂದು ಲಘುವಾಗಿ ಹೇಳಿದರು.
ಪ್ರಕರಣದಲ್ಲಿ ಆರೋಪಿಯು ಪೊಲೀಸ್ ವರಿಷ್ಠಾಧಿಕಾರಿ (SP) ಆಗಿದ್ದರೆ, ದೂರುದಾರರು ಉಪ ಪೊಲೀಸ್ ವರಿಷ್ಠಾಧಿಕಾರಿ (DSP) ಆಗಿದ್ದಾರೆ. ಇಬ್ಬರೂ 2014ರಲ್ಲಿ ಒಂದೇ ಜಿಲ್ಲೆಯಲ್ಲಿ ಒಟ್ಟಿಗೆ ಸೇವೆ ಸಲ್ಲಿಸಿದ್ದರು.
ವಿವಾದವನ್ನು ಪರಿಹರಿಸಲು ಹಿಂದಿನ ಪ್ರಯತ್ನಗಳ ಬಗ್ಗೆ ನ್ಯಾಯಾಲಯವು ವಿಚಾರಿಸಿದಾಗ, ಆರೋಪಿ ಅಧಿಕಾರಿ ಪರ ಹಿರಿಯ ವಕೀಲ ಕೆ.ಪರಮೇಶ್ವರ್, ಹಿಂದಿನ ಆದೇಶದಲ್ಲಿ ಸಂಧಾನಕ್ಕೆ ಸೂಚಿಸಲಾಗಿತ್ತು, ಆದರೆ ಪ್ರಸ್ತಾಪಿಸಲಾದ ಐದು ಕೋಟಿ ರೂಪಾಯಿ ಮೊತ್ತವು ತನ್ನ ಕಕ್ಷಿದಾರನ ಸಾಮರ್ಥ್ಯವನ್ನು ಮೀರಿದೆ ಎಂದು ಹೇಳಿದರು. "ನನಗೆ ಈಗ ಮದುವೆಯಾಗಿದೆ ಮತ್ತು ಇಬ್ಬರು ಮಕ್ಕಳಿದ್ದಾರೆ," ಎಂದರು.
ಆದಾಗ್ಯೂ, ದೂರುದಾರರು ಬಲವಂತವಾಗಿ ಸಂಬಂಧಕ್ಕೆ ಒಳಗಾಗಿದ್ದರು ಎಂಬ ವಾದವನ್ನು ಪೀಠ ಒಪ್ಪಲಿಲ್ಲ. "ಇದನ್ನು ಯಾರು ನಂಬುತ್ತಾರೆ? ನೀವು ಡಿಎಸ್‌ಪಿ," ಎಂದು ನ್ಯಾಯಮೂರ್ತಿ ಪರ್ದಿವಾಲಾ ಹೇಳಿದರು.
ಪ್ರಕರಣದ ವಿಶಿಷ್ಟ ಸನ್ನಿವೇಶಗಳನ್ನು ಗಮನಿಸಿದ ನ್ಯಾಯಾಲಯ, "ಹಿಂದೆ ಏನೇ ಆಗಿರಬಹುದು, ಈ ಪ್ರಕರಣದಲ್ಲಿ ಪರಸ್ಪರ ಹೋರಾಡುವುದು ಪಕ್ಷಕಾರರ ಹಿತದೃಷ್ಟಿಯಿಂದ ಒಳ್ಳೆಯದಲ್ಲ" ಎಂದು ಅಭಿಪ್ರಾಯ ಪಟ್ಟು, ಸೌಹಾರ್ದಯುತ ಪರಿಹಾರವನ್ನು ಕಂಡುಕೊಳ್ಳಲು ಜಮ್ಮು ಮತ್ತು ಕಾಶ್ಮೀರ ಹೈಕೋರ್ಟ್‌ನ ಮಾಜಿ ಮುಖ್ಯ ನ್ಯಾಯಮೂರ್ತಿ ಗೀತಾ ಮಿತ್ತಲ್ ಅವರನ್ನು ಮಧ್ಯಸ್ಥಿಕೆದಾರರನ್ನಾಗಿ ನೇಮಿಸಿದೆ. ಮಧ್ಯಸ್ಥಿಕೆ ಪ್ರಕ್ರಿಯೆಯ ವಿಧಾನಗಳನ್ನು ರೂಪಿಸಲು ಪಕ್ಷಕಾರರಿಗೆ ಮಧ್ಯಸ್ಥಿಕೆದಾರರನ್ನು ಸಂಪರ್ಕಿಸಲು ನ್ಯಾಯಾಲಯ ನಿರ್ದೇಶನ ನೀಡಿದೆ.
ಪ್ರತಿದಿನದ ಕಾನೂನು ಸುದ್ದಿಗಳ ಅಪ್‌ಡೇಟ್‌ಗಾಗಿ ಕೆಳಗಿನ ಲಿಂಕ್ ಮೂಲಕ WhatsApp ಗ್ರೂಪ್‌ಗೆ ಸೇರಿ.
Join ಆಗಲು ಈ ಕೆಳಗೆ ಕ್ಲಿಕ್ ಮಾಡಿ