ಉದ್ಯೋಗದಲ್ಲಿದ್ದು ಕೈತುಂಬಾ ಸಂಬಳ ಪಡೆಯುತ್ತಿದ್ದರೂ, ಆ ವಿವರವನ್ನು ಮುಚ್ಚಿಟ್ಟು ಪತಿಯಿಂದ ಮಧ್ಯಂತರ ಜೀವನಾಂಶ ಕೋರಿದ್ದ ಪತ್ನಿಗೆ ಮದ್ರಾಸ್ ಹೈಕೋರ್ಟ್ ಇತ್ತೀಚೆಗೆ ಹಿನ್ನಡೆ ಉಂಟುಮಾಡಿದೆ. ಕೌಟುಂಬಿಕ ನ್ಯಾಯಾಲಯವು ಪತ್ನಿಗೆ ನೀಡಿದ್ದ ₹15,000 ಮಾಸಿಕ ಮಧ್ಯಂತರ ಜೀವನಾಂಶವನ್ನು ಹೈಕೋರ್ಟ್ ₹10,000 ಕ್ಕೆ ಇಳಿಕೆ ಮಾಡಿ ಮಹತ್ವದ ಆದೇಶ ನೀಡಿದೆ. ಪತಿಯು ಸಲ್ಲಿಸಿದ್ದ ಸಿವಿಲ್ ಪರಿಷ್ಕರಣಾ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಪಿ.ಬಿ. ಬಾಲಾಜಿ ಅವರಿದ್ದ ಏಕಸದಸ್ಯ ಪೀಠ ಈ ತೀರ್ಪು ನೀಡಿದೆ.
ಪ್ರಕರಣದ ಹಿನ್ನೆಲೆ:
ವಿವಾಹ ವಿಚ್ಛೇದನ ಪ್ರಕರಣದ ವಿಚಾರಣೆ ಬಾಕಿ ಇರುವಾಗ, ಪತ್ನಿಯು ತನಗೆ ಮತ್ತು ಮಗುವಿನ ಖರ್ಚಿಗಾಗಿ ಪತಿಯಿಂದ ಮಧ್ಯಂತರ ಜೀವನಾಂಶ ಕೋರಿ ಅಧೀನ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಸಿದ್ದರು. ಈ ಅರ್ಜಿಯನ್ನು ಪುರಸ್ಕರಿಸಿದ್ದ ಅಲಂದೂರಿನ ಉಪ-ನ್ಯಾಯಾಲಯವು, ಪತಿಗೆ ₹15,000 ಮಾಸಿಕ ಜೀವನಾಂಶ ನೀಡುವಂತೆ 2024ರ ಜೂನ್ 15ರಂದು ಆದೇಶಿಸಿತ್ತು. ಈ ಆದೇಶವನ್ನು ಪ್ರಶ್ನಿಸಿ ಪತಿಯು ಮದ್ರಾಸ್ ಹೈಕೋರ್ಟ್‌ಗೆ ಪರಿಷ್ಕರಣಾ ಅರ್ಜಿ ಸಲ್ಲಿಸಿದ್ದರು.
ವಾದ-ಪ್ರತಿವಾದಗಳು:
ಪತಿಯ ಪರ ವಕೀಲರು, "ಅರ್ಜಿದಾರರ ಪತ್ನಿಯು ಪ್ರತಿಷ್ಠಿತ ಕಂಪನಿಯಲ್ಲಿ (ಕಾಗ್ನಿಜೆಂಟ್) ಉದ್ಯೋಗಿಯಾಗಿದ್ದು, ತಿಂಗಳಿಗೆ ₹1 ಲಕ್ಷಕ್ಕೂ ಅಧಿಕ ಸಂಬಳ ಪಡೆಯುತ್ತಿದ್ದಾರೆ. ಈ ಸತ್ಯವನ್ನು ಮುಚ್ಚಿಟ್ಟು, ತಮ್ಮ ಬಳಿ ಯಾವುದೇ ಆದಾಯವಿಲ್ಲ ಎಂದು ಸುಳ್ಳು ಹೇಳಿ ಜೀವನಾಂಶಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ. ಇದು ನ್ಯಾಯಾಲಯಕ್ಕೆ ವಂಚಿಸಿದಂತೆ," ಎಂದು ವಾದಿಸಿದರು. ತಮ್ಮ ವಾದವನ್ನು ಸಮರ್ಥಿಸಲು ಪತ್ನಿಯ ಸಂಬಳದ ಚೀಟಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದರು.
ಇದಕ್ಕೆ ಪ್ರತಿಯಾಗಿ ಪತ್ನಿಯ ಪರ ವಕೀಲರು, "ಅರ್ಜಿಯಲ್ಲಿ ಕೋರಲಾಗಿದ್ದ ಜೀವನಾಂಶವು ತನಗಾಗಿ ಅಲ್ಲ, ಬದಲಾಗಿ ತಮ್ಮ ಮಗುವಿನ ಪಾಲನೆ ಮತ್ತು ಶೈಕ್ಷಣಿಕ ಖರ್ಚುಗಳಿಗಾಗಿ ಮಾತ್ರ. ತಾಯಿಯಾಗಿ ಮಗುವಿನ ಜವಾಬ್ದಾರಿ ಇದ್ದರೂ, ತಂದೆಯೂ ಅಷ್ಟೇ ಸಮಾನ ಜವಾಬ್ದಾರಿಯನ್ನು ಹೊಂದಿರುತ್ತಾರೆ," ಎಂದು ಪ್ರತಿವಾದಿಸಿದರು.
ನ್ಯಾಯಾಲಯದ ಆದೇಶ:
ಎರಡೂ ಕಡೆಯ ವಾದಗಳನ್ನು ಆಲಿಸಿದ ನ್ಯಾಯಮೂರ್ತಿ ಪಿ.ಬಿ. ಬಾಲಾಜಿ ಅವರು, "ಪತ್ನಿಯು ತನ್ನ ಉದ್ಯೋಗ ಮತ್ತು ಆದಾಯದ ಬಗ್ಗೆ ಮಾಹಿತಿಯನ್ನು ಮರೆಮಾಚಿರುವುದು ದಾಖಲೆಗಳಿಂದ ಸ್ಪಷ್ಟವಾಗಿದೆ. ಹೆಚ್ಚು ಆದಾಯ ಹೊಂದಿರುವ ಪತ್ನಿಯು ಮಗುವಿನ ನಿರ್ವಹಣೆಯ ಜವಾಬ್ದಾರಿಯಿಂದ ತಪ್ಪಿಸಿಕೊಳ್ಳುವಂತಿಲ್ಲ. ಮಗುವನ್ನು ಪೋಷಿಸುವುದು ಪತಿ-ಪತ್ನಿ ಇಬ್ಬರ ಸಮಾನ ಜವಾಬ್ದಾರಿಯಾಗಿದೆ," ಎಂದು ಅಭಿಪ್ರಾಯಪಟ್ಟರು.
"ಪತ್ನಿಯು ಹೆಚ್ಚು ಆದಾಯ ಗಳಿಸುತ್ತಿರುವಾಗ, ಅಧೀನ ನ್ಯಾಯಾಲಯವು ₹15,000 ಜೀವನಾಂಶ ನಿಗದಿಪಡಿಸಿರುವುದು ಸೂಕ್ತವಲ್ಲ," ಎಂದು ತಿಳಿಸಿದ ನ್ಯಾಯಪೀಠವು, ಮಧ್ಯಂತರ ಜೀವನಾಂಶದ ಮೊತ್ತವನ್ನು ₹10,000ಕ್ಕೆ ಇಳಿಸಿತು. ಪತಿಯು ಈಗಾಗಲೇ ಮಗುವಿನ ಖರ್ಚಿಗಾಗಿ ಪಾವತಿಸುತ್ತಿರುವ ಹಣವನ್ನು ಈ ಮೊತ್ತದಲ್ಲಿ ಸರಿಹೊಂದಿಸಲು ಅವಕಾಶ ನೀಡಿ, ಉಳಿದ ಬಾಕಿ ಮೊತ್ತವನ್ನು ನಾಲ್ಕು ವಾರಗಳೊಳಗೆ ಪಾವತಿಸುವಂತೆ ಆದೇಶಿಸಿ ಅರ್ಜಿಯನ್ನು ವಿಲೇವಾರಿ ಮಾಡಿತು.
ಪ್ರಕರಣದ ಹೆಸರು: ಎನ್. ಸಂತೋಷ್ ಕುಮಾರ್ ವಿರುದ್ಧ ಎಸ್. ಪ್ರಿಯದರ್ಶಿನಿ
ಪ್ರಕರಣದ ಸಂಖ್ಯೆ: C.R.P.No.4112 of 2024
ನ್ಯಾಯಾಲಯ: ಮದ್ರಾಸ್ ಹೈಕೋರ್ಟ್
ನ್ಯಾಯಪೀಠ: ನ್ಯಾಯಮೂರ್ತಿ ಪಿ.ಬಿ. ಬಾಲಾಜಿ
ತೀರ್ಪಿನ ದಿನಾಂಕ: ಅಕ್ಟೋಬರ್ 25, 2025
ಪ್ರತಿದಿನದ ಕಾನೂನು ಸುದ್ದಿಗಳ ಅಪ್‌ಡೇಟ್‌ಗಾಗಿ ಕೆಳಗಿನ ಲಿಂಕ್ ಮೂಲಕ WhatsApp ಗ್ರೂಪ್‌ಗೆ ಸೇರಿ.
Join ಆಗಲು ಈ ಕೆಳಗೆ ಕ್ಲಿಕ್ ಮಾಡಿ