ದೆಹಲಿ ಹೈಕೋರ್ಟ್ ವಕೀಲರ ಅಕಾಲಿಕ ಮರಣದಿಂದಾಗಿ ಅವರ ಕುಟುಂಬಗಳು ತೀವ್ರ ಸಂಕಷ್ಟಕ್ಕೆ ಸಿಲುಕುವುದನ್ನು ತಡೆಯಲು ಸೂಕ್ತ ನೀತಿ ಅಥವಾ ಯೋಜನೆಯನ್ನು ರೂಪಿಸುವಂತೆ ಭಾರತೀಯ ಬಾರ್ ಕೌನ್ಸಿಲ್ (BCI) ಮತ್ತು ದೆಹಲಿ ಬಾರ್ ಕೌನ್ಸಿಲ್‌ಗೆ (BCD) ನ್ಯಾಯಾಲಯವು ಮಹತ್ವದ ನಿರ್ದೇಶನ ನೀಡಿದೆ.
ಪ್ರಕರಣ: ದರ್ಶನಾ ರಾಣಿ ಮತ್ತು ದೆಹಲಿ ಸರ್ಕಾರ ಮತ್ತು ಇತರರು
ನ್ಯಾಯಪೀಠ: ಮುಖ್ಯ ನ್ಯಾಯಮೂರ್ತಿ ದೇವೇಂದ್ರ ಕುಮಾರ್ ಉಪಾಧ್ಯಾಯ ಮತ್ತು ನ್ಯಾಯಮೂರ್ತಿ ತುಷಾರ್ ರಾವ್ ಗೆಡೆಲಾ.
ಪ್ರಕರಣದ ಹಿನ್ನೆಲೆ: ದೆಹಲಿ ಸರ್ಕಾರದ ವಕೀಲರ ಕಲ್ಯಾಣ ಯೋಜನೆಯಡಿ ನೋಂದಾಯಿಸಿಕೊಂಡಿದ್ದ ವಕೀಲ ಕಮಲ್ ಖುರಾನಾ ಅವರ ಹೆಸರು, ಅವರ ಗುರುತಿನ ಚೀಟಿ ಸಂಖ್ಯೆ (EPIC) ದೃಢೀಕರಣಗೊಳ್ಳದ ಕಾರಣ 2020-21 ಮತ್ತು 2022-23ನೇ ಸಾಲಿನ ವಿಮಾ ಪಾಲಿಸಿಯಲ್ಲಿ ಸೇರ್ಪಡೆಯಾಗಿರಲಿಲ್ಲ. ನಂತರ, 2023ರಲ್ಲಿ ಮರು ಅರ್ಜಿ ಸಲ್ಲಿಸಿ, ದೃಢೀಕರಣಗೊಂಡ ಬಳಿಕ ಅವರ ಹೆಸರನ್ನು ಅಕ್ಟೋಬರ್ 20, 2023ರಿಂದ ಆರಂಭವಾಗುವ ಪಾಲಿಸಿ ವ್ಯಾಪ್ತಿಗೆ ಸೇರಿಸಲಾಯಿತು. ಆದರೆ, ದುರದೃಷ್ಟವಶಾತ್, ಪಾಲಿಸಿ ಆರಂಭವಾಗುವ 79 ದಿನಗಳ ಮುನ್ನ, ಅಂದರೆ ಆಗಸ್ಟ್ 2, 2023ರಂದೇ ಅವರು ನಿಧನರಾದರು. ಹೀಗಾಗಿ, ಅವರ ತಾಯಿ ದರ್ಶನಾ ರಾಣಿ ಅವರು ₹10 ಲಕ್ಷ ವಿಮಾ ಪರಿಹಾರಕ್ಕಾಗಿ ಸಲ್ಲಿಸಿದ್ದ ಅರ್ಜಿಯನ್ನು ಸರ್ಕಾರ ತಿರಸ್ಕರಿಸಿತ್ತು. ಇದನ್ನು ಪ್ರಶ್ನಿಸಿ ಅವರು ಸಲ್ಲಿಸಿದ್ದ ರಿಟ್ ಅರ್ಜಿಯನ್ನು ಏಕಸದಸ್ಯ ಪೀಠ ವಜಾಗೊಳಿಸಿತ್ತು. ಈ ಆದೇಶದ ವಿರುದ್ಧ ಅವರು ವಿಭಾಗೀಯ ಪೀಠಕ್ಕೆ ಮೇಲ್ಮನವಿ ಸಲ್ಲಿಸಿದ್ದರು.
ವಾದ-ವಿವಾದ ಮತ್ತು ನ್ಯಾಯಾಲಯದ ತೀರ್ಪು"ವಿಮಾ ಪಾಲಿಸಿಯ ಅವಧಿ ಆರಂಭವಾಗುವ ಮುನ್ನವೇ ಮರಣ ಸಂಭವಿಸಿರುವುದರಿಂದ, ಒಪ್ಪಂದದ ಪ್ರಕಾರ ವಿಮಾ ಪರಿಹಾರ ನೀಡಲು ಯಾವುದೇ ಬಾಧ್ಯತೆ ಇರುವುದಿಲ್ಲ" ಎಂಬ ಏಕಸದಸ್ಯ ಪೀಠದ ತೀರ್ಪನ್ನು ವಿಭಾಗೀಯ ಪೀಠ ಎತ್ತಿಹಿಡಿಯಿತು. ಹೀಗಾಗಿ, ದರ್ಶನಾ ರಾಣಿ ಅವರ ಮೇಲ್ಮನವಿಯನ್ನು ವಜಾಗೊಳಿಸಿತು.
ದೆಹಲಿ ಬಾರ್ ಕೌನ್ಸಿಲ್‌ಗೆ ಶ್ಲಾಘನೆ: ಇದೇ ಸಂದರ್ಭದಲ್ಲಿ, ದೆಹಲಿ ಬಾರ್ ಕೌನ್ಸಿಲ್ (BCD) ತನ್ನ 'ಅಶಕ್ತ ವಕೀಲರ ಸಮಿತಿ'ಯ ಮೂಲಕ ಅರ್ಜಿದಾರರಿಗೆ ಮಾಸಿಕ ₹10,000 ಸಹಾಯಧನವನ್ನು ಎರಡು ವರ್ಷಗಳ ಕಾಲ ನೀಡಿರುವುದನ್ನು ನ್ಯಾಯಾಲಯ ಶ್ಲಾಘಿಸಿತು.
"ಹೆಚ್ಚಿನ ವಕೀಲರ ಕುಟುಂಬಗಳು ಅವರ ವೃತ್ತಿಯ ಆದಾಯವನ್ನೇ ಅವಲಂಬಿಸಿರುತ್ತವೆ. ವಕೀಲರ ಅಕಾಲಿಕ ಮರಣದಿಂದಾಗಿ ಅವರ ಕುಟುಂಬಗಳು ತೀವ್ರ ಬಡತನಕ್ಕೆ ತಳ್ಳಲ್ಪಡಬಾರದು" ಎಂದು ನ್ಯಾಯಪೀಠವು ಕಳಕಳಿ ವ್ಯಕ್ತಪಡಿಸಿತು.ಈ ಹಿನ್ನೆಲೆಯಲ್ಲಿ, ವಕೀಲರ ಕುಟುಂಬಗಳಿಗೆ ಆರ್ಥಿಕ ಭದ್ರತೆ ಒದಗಿಸುವಂತಹ ಹೊಸ ಯೋಜನೆಯನ್ನು ರೂಪಿಸುವಂತೆ ಭಾರತೀಯ ಬಾರ್ ಕೌನ್ಸಿಲ್ (BCI) ಮತ್ತು ದೆಹಲಿ ಬಾರ್ ಕೌನ್ಸಿಲ್‌ಗೆ (BCD) ನ್ಯಾಯಪೀಠವು ನಿರ್ದೇಶನ ನೀಡಿ, ತನ್ನ ಆದೇಶದ ಪ್ರತಿಯನ್ನು ಕಳುಹಿಸಿಕೊಡುವಂತೆ ಸೂಚಿಸಿತು.